KAMPALA, ຢູກັນດາ — ກໍລະນີ Ebola ຢູ່ຢູກັນດາໄດ້ເພີ່ມຂຶ້ນເປັນ 9 ກໍລະນີ, ໃນຂະນະທີ່ມີຄົນອີກ 265 ຄົນ ກຳລັງຢູ່ພາຍໃຕ້ການຕິດຕາມ ແລະ ການກັກກັນ, ເຈົ້າໜ້າທີ່ສາທາລະນະສຸກກ່າວໃນວັນອັງຄານ.
9 ກໍລະນີນັ້ນລວມມີຜູ້ເສຍຊີວິດຄົນທຳອິດ, ຜູ້ຊ່ວຍພະຍາບານຊາຍ ຜູ້ທີ່ໄດ້ເສຍຊີວິດກ່ອນໜ້າທີ່ຈະປະກາດການລະບາດໃນວັນທີ 30 ມັງກອນ. ຊາຍຄົນນັ້ນຍັງຄົງເປັນຜູ້ເສຍຊີວິດຄົນດຽວ.
ຜູ້ປ່ວຍ 8 ຄົນ “ກຳລັງໄດ້ຮັບການປິ່ນປົວທາງການແພດ ແລະ ຢູ່ໃນສະພາບທີ່ມີສະຖຽນລະພາບ,” ຖະແຫຼງການຂອງກະຊວງສາທາລະນະສຸກກ່າວ. 7 ໃນຈຳນວນນັ້ນໄດ້ຮັບການຮັກສາຢູ່ໂຮງໝໍລັດທີ່ໃຫຍ່ທີ່ສຸດໃນ Kampala, ນະຄອນຫຼວງຂອງຢູກັນດາ, ນອກຈາກນີ້ຍັງມີອີກ 1 ຄົນ ໄດ້ຮັບການປິ່ນປົວຢູ່ໃນເຂດ Mbale ທາງທິດຕາເວັນອອກ, ກະຊວງກ່າວ ແລະ ເພີ່ມວ່າ “ສະຖານະການຢູ່ພາຍໃຕ້ການຄວບຄຸມ” ທ່າມກາງການເຝົ້າລະວັງທີ່ເຂັ້ມງວດ.
ພະຍາບານຜູ້ທີ່ເສຍຊີວິດໄດ້ຊອກຫາການປິ່ນປົວຢູ່ Kampala ກ່ອນ ແລະ ຕໍ່ມາໄດ້ເດີນທາງໄປ Mbale, ບ່ອນທີ່ລາວໄດ້ຮັບການຮັກສາຢູ່ໂຮງໝໍລັດ. ເຈົ້າໜ້າທີ່ສາທາລະນະສຸກກ່າວວ່າ ຊາຍຄົນນັ້ນຍັງໄດ້ຊອກຫາບໍລິການຈາກໝໍປະເພນີອີກດ້ວຍ. ຍາດພີ່ນ້ອງຂອງລາວແມ່ນຈັດຢູ່ໃນຈຳນວນຜູ້ທີ່ໄດ້ຮັບການປິ່ນປົວ Ebola.
Kampala ມີປະຊາກອນທີ່ມີການເຄື່ອນໄຫວສູງປະມານ 4 ລ້ານຄົນ, ແລະ ເຈົ້າໜ້າທີ່ຍັງສືບສວນແຫຼ່ງທີ່ມາຂອງການລະບາດຢູ່.
ການຕິດຕາມການຕິດຕໍ່ແມ່ນສິ່ງສຳຄັນໃນການຢຸດການແຜ່ລະບາດຂອງ Ebola, ເຊິ່ງສະແດງອອກເປັນໄຂ້ເລືອດອອກຈາກໄວຣັສ.
ຍັງບໍ່ມີວັກຊີນທີ່ໄດ້ຮັບການອະນຸມັດສຳລັບສາຍພັນ Sudan ຂອງ Ebola ທີ່ກຳລັງຕິດເຊື້ອຄົນຢູ່ຢູກັນດາ. ແຕ່ເຈົ້າໜ້າທີ່ໄດ້ເລີ່ມການສຶກສາທາງດ້ານຄລີນິກເພື່ອທົດສອບຄວາມປອດໄພ ແລະ ປະສິດທິຜົນຂອງວັກຊີນທົດລອງ ເປັນສ່ວນໜຶ່ງຂອງມາດຕະການໃນການຢຸດການແຜ່ລະບາດຂອງການລະບາດໃນປະຈຸບັນ.
ການລະບາດ Ebola ຄັ້ງສຸດທ້າຍຢູ່ຢູກັນດາ, ເຊິ່ງເລີ່ມຕົ້ນໃນເດືອນກັນຍາ 2022, ໄດ້ສົ່ງຜົນໃຫ້ມີຜູ້ເສຍຊີວິດຢ່າງໜ້ອຍ 55 ຄົນ ກ່ອນທີ່ຈະຖືກປະກາດວ່າສິ້ນສຸດລົງສີ່ເດືອນຕໍ່ມາ.
Ebola ແຜ່ລາມໂດຍການຕິດຕໍ່ກັບນ້ຳທາດໃນຮ່າງກາຍຂອງຜູ້ຕິດເຊື້ອ ຫຼື ວັດສະດຸທີ່ມີການປົນເປື້ອນ. ອາການປະກອບມີໄຂ້, ຮາກ, ຖອກທ້ອງ, ເຈັບກ້າມ ແລະ ບາງຄັ້ງການອອກເລືອດພາຍໃນ ແລະ ພາຍນອກ.
ນັກວິທະຍາສາດສົງໄສວ່າ ຄົນທຳອິດທີ່ຕິດເຊື້ອໃນການລະບາດ Ebola ໄດ້ຕິດເຊື້ອໄວຣັສໂດຍການຕິດຕໍ່ກັບສັດທີ່ຕິດເຊື້ອ ຫຼື ກິນຊີ້ນດິບຂອງມັນ. Ebola ໄດ້ຖືກຄົ້ນພົບໃນປີ 1976 ໃນການລະບາດສອງຄັ້ງທີ່ເກີດຂຶ້ນພ້ອມກັນຢູ່ South Sudan ແລະ Congo, ບ່ອນທີ່ມັນເກີດຂຶ້ນຢູ່ບ້ານທີ່ຢູ່ໃກ້ກັບແມ່ນ້ຳ Ebola, ຊື່ຂອງພະຍາດນີ້ໄດ້ຮັບຊື່ຕາມຊື່ແມ່ນ້ຳ.